مدونة الشاعر زكى خلفه ( أغانى على حدود الوجع)
الاسم: زكى خلفه
البلد: مصر
التصنيفات : خاصة,سياسة وأخبار,أدب وكتب,ألحان وأنغام
أظهر كافة المعلومات
دعــــــوة عامــــــــة
يدعوكم شهر رمضان الكريم
الى حضور المهرجان السنوى
الذى يقيمة فى كل عام
ويعلـــــــــن
عن عدد د كبير من الجوائزلكل ضيوفة
النافلة فية بفريضة
الفريضة بسبعين فريضة فيما سواة
اضربوها ما تضربوها احنا كنا مرات ابوها
اضربوها أدبوها كلمه اوعوا تسحبوها
سيبنى ليفنى دغدغيها وبعيون صهيون شوفيها
وان لقيتى فيها ظلطه خلي عاليها واطيها
موّتوا الأطفال يا ساده اصل أعدادنا زيادة
خففوا الأزمات بموتهم وتعيدوها وتبقى عاده
خالوا صرختهم تدوم احنا مش ناقصين هموم
اصل ما ينوب المخلص
وعايز اصرخ الليلة
ومش لاقى لصوتى طلوع
وعايز اقتل الفرسة
وامسك سيفى بالمقلوب
واقول مابقتش فى النية
لروحى رجوع
واقول مغلوب
واخلى منتظر يضرب
وشوش القادة والرؤسا
يجيب النخوة يضربها يشبعها
يرجعها ولو دوبها بالمركوب
وعايز افتح القنوات على جرحى
وانزف ميت نشيد بعويل
يداوى دمنا المسكوب
وعايز موت وعايز للقبيلة صوت
وعايز ارفع الاكفان على اديا
وللاقصى ااقولة افدى
وموت فينا ما يهمكش
ولا صرخة يتيم توفى
ولا موت الشباب يكفى
ولا شوفنا ولا زيك
الست جزمة
يا ريتها كانت طلقة رصاص
او حتى مدفع امضاء حماس
يا ريتها كانت الست جزمة
نووية كانت برباط وناسفة
ياريتها كانت لكل ظالم
حاكم بامرة مالوهش لازمة
يا زيدى يالى رفعت راسنا
شفيت صدور العالم بجزمة
دا الكل خايف ينطق يقول
وصاحبنا داير يصول يجول
ولاحد همة بيدوس علينا
لا وزن لينا ولا حتى قيمة
وانت اللى راجل فى وسط امة
وسط المخاطر عليت بهمة
يا كلب وسع وشوف مقامك
صور فلسطينية
الصورة الاولى
اسمحلى أقطع دواوينى
وارحل عن ارضك
لا البيت بقى بيتى
ولا حتى بناتى بقوا عرضك
واسمحلى اعلق جماجمهم
قضبان على قصرك
الصورة التانية
الوش خلاص بقى متغير
مبقاش فية دم
بقى نعل فى جزمة سام العم
والكل فى امرك متحير
لية بعت الام وبقيت لعدوك
(مسرحية واحنا مالنا )
تأليف :زكى خلفة
المشهد الاول
(مجموعة من الطلاب يلتفون حول داتا شو يعرض مشاهد من فلسطين ولبنان وبعض الدول الاخرى
ويمرا بهما طالبان يضحكان وهما فى حالة انسجام )
أحمد: اية دا اية اللمة دى
فتحى : ايوة صح عرفتة دا باينله مهرجان السينما للجميع
أحمد: دا باينلها لعبت يا توحة وهنتفرج بلوشى
فتحى : طب ياللا بينا
(يدخل الطالبان فى وسط المجموعة ويقف طالب من بينهم خطيبا )
طالب1 : وهكذا يا اخوانى العالم الاسلامى كلة يأن ويتعذب
طالب2 : وليس هناك مكان على الخريطة تضع يدك علية الا وتجد مسلم يستنجد بك وبى ان ننقذهم
ونمد يد العون لهم .
طالب3 : فلسطين الشيشان البوسنة والهرسك لبنان العراق كلها جراح فى الأمة الاسلامية
احمد: كابتن كابتن , ايه الاماكن البعيدة قوى دى الشيشان والبوسنة والهرسك مالنا احنا ومالهم .
ط2: مالنا ومالهم اذاى , مش دول بردة بشر ذى ما احنا بشر , مسلمين ذى ما احنا مسلمين ,
ط1 : كل الضحايا اللى احنا شايفنهم دول بينادو علينا ليل نهار .
فتحى : لا يا عم , بينادو عليك انت لوحدك انا عن نفسى محدش نادى عليّـه .
أحمد : وحياتك ولا انا , وبعدين احنا اساساً ساكنين فى السابع يعنى لو حد نده مش هنسمع وإن سمعنا هنكسل ننزل .
ط3 : احنا هنا مش بنهزر احنا بنتكلم عن ناس بتموت ضحايا .
ط1: أم طلعوها من الانقاض حاضنة ابنها , والطفل متشعلق بصدر امه جريمتة إيه , جريمتها أية انهم مسلمين . . ! فوقوا بقى .
ط2 : دم الضحايا بينادى علينا .
فتحى : ياعم دم ايه ! والله العظيم الأرض نضيفة وذى الفل ولسة مسفلتين المسرح اهه .
أحمد : يا جماعة يا جماعة ! احنا جايين الجامعة عشان حاجة واحدة . . ننبسط ونهيص ونتروشن
فتحى : (يعد على اصابعة ) دا يبقوا تلاتة ياحبيبى .
احمد : وبس
فتحى : كدا بقوا اربعة ( يضحك الاثنان معا )
ط1 يا جماعة مين اللى قال كدا بقولك احنا اتخلقنا لغاية اكبر من كدا .
أحمد : لغاية كدا ياعسل كفاية قوى انا هسيبك ويا الضحايا بتوعك وعندى دفنة فى الكافتيريا اخلصها واجيلك اخد العزا بالإذن يا عم المصلح هتصلحوا الدنيا ؟!
فتحى : يمشى وهو يغنى اغنية العيال مين هيشلها
المشهد الثانى
يدخل فتحى واحمد غرفتهما وهما يضحكان ويلقيان انفسهما على السرير
أحمد: البوستة والهرسك الشيشات
فتحى: كوبرى العطف اول القطعة
احمد: انت عارف احلى حاجة فى الموضوع دة , حكاية الضحايا اللى تنادى ليل نهار دى .
فتحى: ياعم داباينلهم عالم فاضية .
أحمد : بقولك إية خلينا فى المهم (احممم) احنا لازم ننام علشان عندنا الليلة سهرة جامدة طحن
فتحى : بينا ننام يا عم الحلو انت كمان خخخخخخخخخ
( اظلام تام للمسرح يظهر فردان وهما يرتدون ملابس بيضاء عليها أثر الدماء يحاولان ايقاظهما )
أحمد : يوووة يابنى يابنى ارحمنى عايز اتخمد
احد الرجلين : قوم للحساب
أحمد : حساب اية وقرأة اية فى ليلتك الجبر دى
الرجل الثانى : ماقلنالك قوم للحساب
أحمد: قامت قيامتك يافتحى يا فتححىىىىىىى
فتحى : يوووو يابنى انا جيت يام ي ي ياااااما انتو مين وعايزين اية
( الرجلان معا: احنا الضحايا وجايين علشان الحساب )
أحمد: انت طلبت حاجة دلفرى واكلت مين غير ماتحاسب ؟ إديهم حسابهم ومشيهم
فتحى: يا عم واللة اول مرة اشوفهم
احمد: ايوة بس دى حركة صح حركة وعاملينها فينا علشان تخوفونا
فتحى : اطلع من دول ياعم الحلو انت وهو دا احنا عملتها يجى تلتمتين مرة قبليكم
ضح1 : احنا صبرنا عليك نفد , قوم وبلاش كلام كتير ( يمسكة من زراعة)
أحمد: دا بينلة بجد يا فتحى دا اديهم تقيلة قوى
فتحى انا قايم لوحدى انا مؤدب ونبى ماتزقش
أحمد: مين دول دول
ضح1:بقية الضحايا من صبرا وشتيلا وقانا وجنين وفلسطين والعراق
ضح2: دا غير بتوع البوسنة والشيشان وافغانستان البلاد البعيدة قوى دى
أحمد : كنت بهزر
فتحى: ممكن اعرف انتوا عايزين مننا اية
ضح1 : جايين نحسبكوا
فتحى: تانى . .! تحاسبونا على اية احنا عمرنا ماكان لنا دعوة بحد
احمد: يعنى على بلاطة طول عمرنا فى حالنا ويس
ضح : 2 يابنى افهم ماهو علشان كدة احنا جايين نحاسبكوا
أحمد:إذاى بقى
ضح1 انت ماسمعتش حديث النبى صل الله علية وسلم من لم يهتم بامر المسلمين فليس منهم
فتحى : يعنى اية
يعنى علشان احنا مسلمين ربنا واحد نبينا واحد لازم نشيل هم بعض وإلا….
احمد : واللا اية
ضح2: ماتستحقش تكون مسلم
فتحى : على فكرة ياجماعة انتو مكبرين المسائل قوىاحنا صحيح عمرنا ما اهتمينا باللى بيحصل فى أى مكان فى العالم ا بس احنا ما اذنكوش ما ضرنكوش فى شئ
ضح1 : سكاتكم صمتكم كان هو الخنجر االممدود لصدورنا ولضهرنا كمان
ضح2 : الساكت عن الحق شيطان اخرس
احمد: اذاى ياجماعة فهمونا اكتر
ضح1عارفين قصة التلات تيران والا سد
أحمد : اية دخل دا فى الموضوع بتاعنا
ضح 2 : دا هو دا الموضوع بتاعنا
ضح1 : كان فية تلت تيران الاسود والبيض والاحمر
وكان فية أسد حاول كتير انة ياذيهم اويقربلهم لكن ما قدرش
ضح2 : لانهم كانو يد واحدة قوة واحدة
ضح1 : الاسد كان متأكد انة مش هيقدر يتغلب عليهم الا لما يفرق بينهم
ضح1: فرق تسد
ضح2 : فعلا راح لهم وأقنعهم انهم يعملوا معاهدة سلام وانهم اولاد عمومة واحتمال يكونو اخوات ومن اب واحد
فتحى: وعلى كدة صدقوا
ضح2 : للاسف ذى ما بيحصل دايما صدقوا
ضح1 : وبعدين راح للتور الاسود والاحمر واقنعهم ان الطور الابيض دا شايف نفسة قوى ومتعنتظ ( بصوت منخفض ) وعلى فكرة هو دايما اللى بيدل عليهم
ضح2 : وتقريبا له ميول ارهابية وانة تلقى تدريبات فى افغانستان او ايرن وانة ينتمى لتنظيم القاعدة
ضح1 : الثور الاسود والاحمر ابتدوا يبعدوا حبه بحبه عن التور الابيض
استغل الاسد الفرصة و هجم على طول على التور الابيض استغاث بخواتة فى ظنكم كان رد فعلهم اية
أحمد: اكيد اكيد ماسبهوش لوحدة
ضح2: محدش سمع ولاشاف , و أعتقد انهم قالوا انه يستاهل لأنه جر شكل الأسد , ولأنه كان بيقاومه لما حاول يأكله . .
فتحى : مسكين الأسد !
ضح 1: الأسد ما كتفاش بالتور الأبيض , راح للتور الأسود و أقنعه إن التور الأحمر لونه فاقع قوى , وأنه المنافس الوحيد ليه فى الغابة .
ضح2: و أعتقد كمان إنه أقنعه إنه هيكون حليفه و دراعه اليمين فى المنطقة , آسف فى الغابة . كل اللى كان مطلوب منه الصمت و السكوت و أحياناً الشجب و الإدانة .
ضح1 : طبعاً أكيد وصلتوا لنهاية القصة , التور الاسود يا سادة أصبح وحيد .
ضح2 ( متهكماً و هو ينظر إلى أحمد و فتحى ) : ما هو كان فى حاله و ملوش دعوه بحد .
ضح1: لما جت اللحظة الموعودة و فاق من الصدمة اكتشف .
ضح2: إن كل الوعود و المواثيق الدولية خدعة كبيرة .
ضح1: التور الأسود قال كلمة بقت حكمة , وكل الناس بترددها لحد دلوقتى .
ضح2: إنما أكلت حينما أُكل الثور الأبيض . . .
فتحى : تقصد إن إحنا كنا التور الأسود , وانتم كنتم التور الأبيض ( مشيراً إلى الضحية 2)
ضح2: بس لو سمحت ما تشاورش .
ضح1: صح مظبوط تمام .
ضح2: و سكاتكم كان هو السبب فى اللى وصلناله دلوقتى . أصبحنا يا سادة ( مشيراً إلى نفسه و إلى زميله ) ضحايا .
أحمد : لأ لأ , انتم بتبالغوا , انتم كده بتظلمونا , محدش كان يقدر يعمل لكم حاجة .
فتحى : أيوة إيه اللى كان فى إيدينا نعمله .
ضح1: كنتم تقدروا تعملوا زى المعتصم .
أحمد : المعتصم ! , و إيه بقا اللى عمله المعتصم .
مسرحية
انا أسف
تاليف :زكى خلفة
مسرحية:انا اسف تاليف: زكى خلفة
المشهد الاول
المكان ساحه فسيحه بها مجموعه من الماره واخرين يجلسون على مقهى
يوجد بها المعلم عبده صاحب القهوه والصبى نمره ومحمد احد رواد القهوه وفتحى مدمن
نمره : ايوه جاى ايوه جاى
المعلم : واد يا نمرة
نمره: ايوه يا معلمى
المعلم: تعالى هنا نشفت التفل(بصوت منخفض)
نمره: نشفت التفل يامعلم بتاع تانى مره
المعلم وطى صوتك هتفضحنا
نمره: ايوه جاى وهو يتلفت
يدخل مجوعه من الطلبه فى يد كل واحد موبايل
طالب1: خوش ع البلتوث
طالب2 : معاك النغمه دى كول كول صراحه افتح البلتوث
طالب 1: شوف الفيديو دا رهيب
طالب2 :اذيك يامعلم عبده عايزين شاى
المعلم: اذيك وعندك 2 شاى للطلبه المزوغه
بائع اللب: تسالى يالب حد عايز يتسلى
فتحى:(ينادى على بائع اللب )تعالى عايزك معاك برشام
بائع اللب: برشام ايه الله يخرب بيتك
فتحى : طب بلاش سيجارة بانجو وهو يمسك بيده
بائع اللب: ياعم ابعد عنى انا عايز اربى العيال( وهو يخلص يده منه فى هذه اللحظه يقع البرشام من جيبه) يصرخ البرشام( يبتعد عنه)
فتحى: تسالى يا بانجو وهو يضحك
ابراهيم يدخل القهوة متجها نحو محمد
محمد :هيما انت فين ياعم
ابراهيم : ايه يابنى انت مرحتش الشغل
محمد: لا بصراحه رحت بس زوغت
ابراهيم : يا بنى حلل اللقمه اللى بتاكلها
محمد: انت هتعملى مصلح مهو كله بيسرق وكله حرامى جت عليه انا
ابراهيم : لو كل واحد قال زيك يبقى علينا العوض فى امة محمد
محمد: بقولك ايه انت عليك عشرة طاوله من الشهر اللى فات اقعد بس اقعد
فى هذة اللحظه يدخل بائع الجرائد
بائع جرائد ينادى بصوت عالى
بائع الجرائد: اقرا الخبر اقرا الخبر
الصحيفة الدنمركيه والرسوم المسيئه للنبى
اقرا الخبر فلم كرتون ولعبه تستهزئ بالنبى
ااقرا الخبر مئات المظاهرات فى انحاء العالم للتنديد بالإساءة بالنبى
ااقرا الخبر ( ثم ينصرف)
المعلم: يانهار ابوهم مطين دا كله الا النبى اذاى الكلام دا يا جدعان بس
ابراهيم : لا حول ولا قوة الا لله انا لله وانا اليه راجعون
محمد: ايه فيه ايه
ابراهيم: حتى النبى وصل الاستهزا بالنبى صلى الله عليه وسلم
انت عارف لو عرفو النبى صح عمرهم ما كانوا عملوا كدا
لو قروا سيرته كانو حابوه قوى
الرحمه المهداه النور المبين مشعل الهدايه صلى الله عليه وسلم
المعلم : الله يفتح عليك يا استاذ براهيم والله ما فيه زى النبى اللهم صلى عليك يانبى
نمره: صلى على رسول الله
محمد : صلى الله عليه وسلم هى بصراحه حاجه تضايق بس يعنى احناهنعمل ايه يعنى الشتيمه بتلزق
اهم هيشتموا حبه وبعدين يسكوتو ياخى العب العب
ابراهيم بالله عليك مش مكسوف من نفسك وانت بتتكلم كده
محمد: ليه انت عايزنا نعمل ايه نروح نحارب ولا نحارب
ابراهيم: لا بس على الأقل تغضب تقف تقول لاء لاء انصر النبى
محمد: يا اخى متكبرش المسائل بس اقعد العب ما احنا حلوين كدا
فتحى : هروين مين جاب سيرة الهروين
المعلم يمسك به من ياقته ويدفعه هروين ايه فوق بقى هو جابنا لوره غيرك انت واللى زيك
(يدخل حسين الصحفى وفى يده نسخه من الجريده) ……..
حسين:لا حول ولا قوة الا بالله
محمد: فيه انت كمان تعالى اقعد
حسين شوفتوا ايه اللى حصل
محمد: حصل ايه
حسين: حتى هولندا كمان بتستهزئ بالنبي
ابراهيم: الوضع دا مايتسكتش عليه
محمد : وهنعمل ايه بس
حسين : انا عن نفسى كتبت فى الجرنال مقاله شتمت وسبيت سلسفيل ابوهم وقلت (يقف فوق كرسى ويتكلم بلهجه خطابيه)انها استهانه بالامه الاسلاميه
ذى ما اليهود استهانو بفلسطين والامريكان استهانوا بالعراق وبالصومال
وذى مااحنا فرطنا فى دينا وشرفنا وبقى لليهود دوله وعلم بيرفرف فوق نيل مصر
اطردو السفير اليهودى
المعلم: جدع والله يا استاذ حسين جدع انا لو من الريس بتاعك كنت رقيتك
حسين : ماهو فعلا عمل بالنصيحه دى ومانشرش المقال
ابراهيم: ليه بس
حسين: قالى اسرائيل دوله صديقه
طالب :تسمحولى انا عايز اسئل سؤال بس وبعدين انت ماقتلوناش
ايه اللى ممكن نعمله
طالب2 ايوه ايه اللى بادينا نغيره
ابراهيم: بادينا كتير
محمد: ذى ايه
ابراهيم : ذى مافلت من شويه انصر النبى ودا برده مش معناه انك تروح تحارب لا
بس ممكن تحارب نفسك شهوتك ادمانك اهمالك فى عملك بكدا النبى يحبك وتبقى صحيح من اتباعه وبكدا تنصره
حسين:طب والدنمارك وهولندا نعمل فيهم ايه
ابراهيم: الدول دى يا صاحبى على قد ما بيتحججوا بحرية الراى على قد مابيخافو قوى على مصالحهم الاقتصاديه واكتر سلاح يتعبهم المقاطعه
المعلم: طب والله يااستاذ ابراهيم لانا مقاطعهم ولسانى ماهو مخاطب لسانهم ولوحد جه مش مقعده على القهوة
حسين : يا معلم المقاطعه معناها انك تقاطع منتجاتهم بضايعهم يامعلم
المعلم: اه
طالب: طب ودى تاثر فيهم اذاى
ابراهيم : هاقولك بالارقام
شركة ماكدونالدز خسرت لوحدها بس خسرت حوالى 800 مليون دولار وقفلت حوالى 700 مطعم وأطلقت شعار (عربية 100%)،وبدأت لأول مرة في تقديم وجبات عربية فى محاولة لاقتاع الناس انها عربية
حسين: على فكرة انا سمعت من الجنة المصرية للمقاطعة ان شركة كوكاكاولا
انخفضت قيمة علامتها التجارية العالمية بنسبة 13%. وخسائر كوكاكولا في مصر تجاوزت اكثر من نص رأس المال يعنى حوالى400 مليون جنيه).
ابراهيم: لا وخد عندك دى تسمعو طبعا عن اريال المسحوق المعروف اللى علية نجمة داود اللجنة قالت ان الخسائر وصلت260مليون دولار
حسين ايوة بالظبط ودا اللى اضطرهم يشيلو نجمة داود من علية
ابراهيم: وهو دا اللى احنا عايزينة لو نقدر نقاطع هيحترمونا ولو احترمونا هيحترموا دينا ويعرفو ان النبى لا مات ولا خلف بناتة
المعلم: معقولة ياناس الكلام دا
محمد: اتهيالى انكم بتبالغو شويتين
ابراهيم: دا كلام موثق بالارقام صادر عن اللجنة المصرية لمقاطعة البضائع والمنتوجات الامريكية
محمد :انتو شكلكو كدا هتتعبو نفسكو على الفاضى يا معلم هتلقنا واحدة ببس انا ريقى نشف
المعلم: لا من النهاردة لاببس ولا كولا ولا اى منتج يضحك فى وشنا ويقتلنا فى ضهرنا فية كركرية ينفع
المشهد الثانى
( مكتب رئيس التحرير والصحفى صاحب الرسوم المسيئة للنبى الاثنان يبدو عليهم علامات الدهاء والمكر يحبذ ان يرتدى احدهم الطاقية الخاصة باليهود)
الصحفى: شوفت بقى يا سيادة رئيس التحرير الرسوم بتاعتى عملت اية هزت الدنيا كلها
رئيس التحرير فعلا مبيعات الجريدة ارتفعت بشكل كبير
الصحفى :دا انا مجهزلك شوية رسومات جديدة وفلم كرتون ولعبة لكل قارئ للجريدة رئيس التحرير :برافو عليك برافو يبقوا يورونا هيعملوا اية المسلمين دول هاهاها
يدخل رجل الاعمال وهو ثائر
رجل الاعمال
